Erion Veliaj, kryetari i Bashkisë së Tiranës, është transferuar nga burgu i Durrësit në atë të Fierit. Vendimi është marrë nga Drejtoria e Përgjithshme e Burgjeve, e cila ka ndryshuar institucionin ku ai mbahej në paraburgim.
Transferimi vjen vetëm dy ditë pasi Veliaj publikoi një mesazh në rrjetet sociale, përmes të cilit shprehu qëndrimin e tij lidhur me protestat studentore që po zhvillohen në Tiranë.
Sipas informacionit të raportuar, lëvizja nuk është kryer me kërkesë të vetë Veliajt. Ai mbahej në burgun e Durrësit që prej shkurtit të vitit 2025, kur u arrestua.
Dy ditë përpara transferimit, Erion Veliaj reagoi për zhvillimet politike në Serbi dhe humbjen e zgjedhjeve nga Aleksandër Vuçiç, duke përcjellë njëkohësisht edhe një mesazh për kryeministrin Edi Rama lidhur me protestat studentore.
Në reagimin e tij, Veliaj theksoi se lëvizjet e studentëve nuk duhen parë si një kërcënim, por si një shenjë e ndryshimeve që po kërkon brezi i ri.
“Lëvizjet dhe protestat studentore nuk janë ‘fundi i botës’, por fundi i ‘një bote’. Sa më shpejt ta kuptojmë këtë si qytetarë e politikëbërës, aq më mirë do të dimë t’u përgjigjemi nevojave dhe pritshmërive të kësaj gjenerate”, shkroi ai.
Transferimi i Veliajt vjen në një moment kur protestat studentore dhe reagimet politike ndaj tyre janë në qendër të vëmendjes. Megjithatë, deri më tani nuk ka informacion që të konfirmojë një lidhje mes postimit të tij dhe vendimit për transferimin nga burgu i Durrësit në atë të Fierit.
