Pritjes për Big Brother VIP Albania 6 po i vjen gjithnjë e më shumë fundi, ndërsa përgatitjet për sezonin e ri kanë nisur të marrin formë. Këtë herë, një detaj që nuk ka kaluar pa u vënë re është zbuluar nga vetë Sara Hoxha, e cila ka ndarë me ndjekësit një pamje nga ambientet ku po ndërtohet shtëpia e re e spektaklit.
Përmes një fotografie të publikuar në Instagram Story, producentja është shfaqur përpara pasqyrës, ndërsa pas saj duken hapësirat ku po zhvillohen punimet. Edhe pse ambientet janë ende larg pamjes përfundimtare, fotografia ka mjaftuar për të ngjallur kureshtjen e fansave të formatit.
Në imazh dallohen mure të bardha, ambiente të gjera dhe materiale ndërtimi, duke lënë të kuptohet se puna për transformimin e shtëpisë është në zhvillim e sipër.
Por vëmendjen më të madhe e ka marrë mesazhi që shoqëron fotografinë. “Mirëmëngjes :)”, ka shkruar Sara, duke etiketuar edhe profilin zyrtar të Big Brother VIP Albania, krahas dy zemrave. Një detaj i vogël, por që e bën të qartë lidhjen e publikimit me përgatitjet për sezonin e ri.
Sara Hoxha via Instagram Story
Ky nuk është sinjali i parë që tregon se BBVA 6 po afron. Vetëm pak ditë më parë, Top Channel prezantoi logon e edicionit të gjashtë përmes një videoje promovuese, të shoqëruar me fjalët “Së shpejti”.
Edhe identiteti vizual i këtij sezoni duket se do të vijë me ndryshime. Logoja e re ndërthur ngjyrën blu me atë portokalli, ndërsa simboli i njohur i syrit është ruajtur, por këtë herë me një paraqitje të rifreskuar.
Megjithatë, pikëpyetjet rreth sezonit të ri mbeten ende të shumta. Deri më tani nuk është bërë publike data e nisjes së BBVA 6, ndërsa produksioni nuk ka zbuluar asnjë emër nga personazhet që pritet të hyjnë në shtëpinë më të komentuar në Shqipëri.
Fotografia e Sarës përbën një nga pamjet e para nga prapaskenat e spektaklit, duke shtuar edhe më shumë kureshtjen për atë që po përgatitet. Tashmë fansave u mbetet të presin zbulimin e shtëpisë së përfunduar dhe surprizat që do të sjellë ky edicion.
