Kylie Jenner po përballet me një tjetër betejë ligjore, pasi një ish-punonjëse e saj ka ngritur një padi me pretendime serioze për mënyrën se si është trajtuar gjatë punësimit. Në qendër të akuzave janë disa incidente të pazakonta në pronat e yllit amerikan, ndërsa numri i padive të ngritura nga ish-punonjëset e saj brenda shtatë muajve ka arritur në katër.
Padia më e fundit është depozituar nga Dinora Carolina Cabria Amaya, e cila ka punuar si mirëmbajtëse në pronat e Jenner. Ajo pretendon se gjatë punës është përballur me situata shqetësuese, përfshirë kafshimin nga një qen, ekspozimin aksidental ndaj gazit irritues dhe bllokimin për më shumë se një orë në një garderobë.
Sipas dokumenteve gjyqësore të siguruara nga Page Six, padia është paraqitur më 5 nëntor në Gjykatën e Lartë të Los Angelesit. Amaya ngre pretendime për diskriminim për shkak të aftësisë së kufizuar, hakmarrje, largim të padrejtë nga puna dhe shkelje të të drejtave të punonjësve. Në çështje janë përfshirë Kylie Jenner, disa kompani të saj dhe pjesëtarë të stafit.
Ish-punonjësja pretendon se ishte punësuar në mars të vitit 2025, me një pagesë prej 40 dollarësh në orë, të cilën e merrte në dorë. Sipas saj, ajo punonte zakonisht gjashtë ditë në javë, pa marrë kompensimin e duhur për orët shtesë. Gjithashtu, pretendon se duhej të udhëtonte mes pronave të ndryshme të Jenner, pa iu rimbursuar koha dhe shpenzimet e transportit.
Një nga episodet më të pazakonta të përshkruara në padi lidhet me një garderobë në shtëpinë e Kylie Jenner. Amaya pretendon se mbikëqyrësja e saj, Laura Dooley, i kishte dhënë një kod për të hyrë në ambient, por dera nuk u hap më pas saj dhe ajo mbeti e bllokuar për mbi një orë.
Sipas versionit të paraqitur në gjykatë, ajo telefonoi disa herë mbikëqyrësen për të kërkuar ndihmë, por pretendon se nuk mori zgjidhje të menjëhershme dhe se situata u shoqërua edhe me tallje.
Në dokumentet e padisë citohet një përgjigje që Dooley dyshohet se i kishte dhënë:
“Askush nuk ndodhet në shtëpi që mund të të nxjerrë dhe unë nuk mund t’ia jap fjalëkalimin dikujt tjetër, kështu që thjesht duhet të presësh”.
Por ky nuk ishte i vetmi incident që Amaya pretendon se ka përjetuar. Në shtator 2025, gjatë pastrimit të një sirtari në lavanderi, një bombol me gaz irritues, që sipas saj nuk ishte ruajtur në mënyrë të sigurt, u aktivizua aksidentalisht.
Ish-punonjësja pretendon se lënda kimike i përfundoi në fytyrë dhe në sy, duke i shkaktuar djegie, kruarje, tharje, irritim dhe turbullim të shikimit.
Një muaj më vonë, sipas padisë, ajo u kafshua nga një qen teksa po pastronte në një tjetër pronë të Jenner. Amaya pretendon se e raportoi ngjarjen, por nuk mori trajtimin e nevojshëm dhe u detyrua të siguronte vetë medikamente pa recetë për plagën.
Në dokumente përmendet gjithashtu se asaj i kërkohej shpesh të largohej nga ambientet ose të qëndronte jashtë fushëpamjes së Kylie Jenner, pasi kjo e fundit, sipas pretendimeve, nuk dëshironte ta shihte.
Marrëdhënia e punës përfundoi më 6 shkurt, menjëherë pasi Amaya kishte ngritur shqetësime për trajtimin e pabarabartë të shpenzimeve të udhëtimit. Ajo pretendon se një punonjëse tjetër përfitonte rimbursim, ndërsa kërkesat e saj nuk merreshin parasysh.
Avokatja e ish-punonjëses, Della Shaker, ka deklaruar për Page Six se çështja nuk duhet parë thjesht si një konflikt individual. Sipas saj, rasti nxjerr në pah vështirësitë me të cilat mund të përballen punonjësit shtëpiakë kur punojnë për persona me pasuri dhe ndikim të madh.
Shaker theksoi se punonjësit mund të hezitojnë të raportojnë shkeljet nga frika se nuk kanë mundësi të përballen me fuqinë e punëdhënësve të tyre.
Nga ana tjetër, Michael Rhodes, avokati i Kylie Jenner, i ka hedhur poshtë pretendimet. Ai ka vënë në pikëpyetje edhe motivet e avokates Shaker, duke pretenduar se ajo po përpiqet të përfitojë financiarisht përmes publicitetit.
Rhodes ka deklaruar se Jenner dhe kompanitë e saj do t'i kundërshtojnë me vendosmëri të gjitha akuzat, të cilat i konsideron të pabazuara.
Katër padi nga ish-punonjëset brenda shtatë muajve
Rasti i Amaya-s vjen pas tri padive të tjera të ngritura gjatë këtij viti nga gra që kanë punuar për Kylie Jenner ose kompanitë e saj.
- 17 prill – Angelica Hernandez Vasquez: Ish-mirëmbajtësja pretendon se është përballur me diskriminim dhe ngacmime për shkak të origjinës salvadoriane, besimit katolik dhe statusit të emigracionit. Ajo ka përmendur tallje për mënyrën e të folurit, detyra më të vështira dhe një incident ku një mbikëqyrës dyshohet se i hodhi varëse rrobash në këmbë. Çështja vijon të jetë në shqyrtim, ndërsa në tetor palët zhvilluan seanca ndërmjetësimi.
- 29 prill – Juana Delgado Soto: Një tjetër ish-punonjëse ngriti akuza për diskriminim, ngacmime dhe hakmarrje. Sipas saj, i kërkohej të mos e shikonte apo t'i buzëqeshte Kylie-t dhe, kur ylli ndodhej në shtëpi, duhej të qëndronte e fshehur për orë të tëra në banjë ose në garazh. Ajo pretendon gjithashtu se i kufizohej përdorimi i ujit të pijshëm dhe i tualetit, si dhe se nuk mori mbështetjen e duhur pas vdekjes së vëllait.
- 22 qershor – Jane Doe: Një ish-kuzhiniere private ngriti padi për diskriminim për shkak të shtatzënisë dhe largim të padrejtë nga puna. Ajo pretendon se, pavarësisht një shtatzënie me rrezik të lartë, iu kërkua të kryente detyra të lodhshme dhe të punonte me orar të zgjatur gjatë festimit të ditëlindjes së një familjari të Jenner në Palm Springs. Sipas saj, të nesërmen pësoi hemorragji dhe në spital mësoi se kishte humbur shtatzëninë.
Kuzhinierja pretendon gjithashtu se nuk mori mbështetjen e nevojshme pas humbjes dhe se më pas iu ndërpre marrëdhënia e punës. Ekipi ligjor i Jenner ka kundërshtuar kërkesën e saj për anonimitet dhe ka kërkuar që identiteti i saj të bëhet publik. Seancat për këtë çështje janë caktuar më 25 dhe 28 janar 2027.
Një element që lidh të katër çështjet është se ish-punonjëset përfaqësohen nga e njëjta avokate, Della Shaker, ndërsa në disa prej padive përmenden edhe kompani dhe mbikëqyrës të njëjtë.
Megjithatë, pavarësisht seriozitetit të pretendimeve, asnjëra prej këtyre akuzave nuk është provuar ende në gjykatë. Kylie Jenner dhe përfaqësuesit e saj i kanë kundërshtuar pretendimet, ndërsa proceset ligjore pritet të përcaktojnë përgjegjësitë e palëve.
