Hyrja e Shqiponjës në shtëpinë e “Big Brother VIP Kosova 5” ka rikthyer në vëmendje një histori të dhimbshme nga jeta e saj, të cilën ajo e kishte ndarë me publikun shumë kohë përpara se të bëhej pjesë e reality show-t.
Banorja nga Drenasi kishte zbuluar në shkurt të vitit 2025, gjatë një interviste për emisionin “Prive By LS”, se jeta e saj kishte nisur në rrethana të vështira. Ajo kishte treguar se ishte braktisur nga prindërit biologjikë menjëherë pas lindjes.
Sipas historisë që kishte rrëfyer vetë, Shqiponja ishte gjetur në rrugë nga një polic, kur ishte ende një foshnjë e porsalindur. Pas kësaj, ajo përfundoi në një familje tjetër, e cila e adoptoi dhe u kujdes për të gjatë gjithë fëmijërisë.
Një tjetër detaj që e bën historinë e saj edhe më prekëse është fakti se për një pjesë të madhe të jetës, Shqiponja nuk e dinte se ishte fëmijë i adoptuar. Vetëm më vonë zbuloi të vërtetën për origjinën e saj dhe ndau publikisht emocionet që përjetoi kur mësoi rreth së kaluarës.
Pavarësisht dashurisë dhe kujdesit që kishte marrë nga familja adoptuese, ajo nuk e kishte braktisur kurrë dëshirën për të zbuluar se kush ishin prindërit e saj biologjikë.
Në intervistën e dhënë vitin e kaluar, banorja tregoi se prej rreth dy vitesh kishte nisur kërkimet për ta. Ajo shpresonte të zbulonte arsyet që kishin çuar në braktisjen e saj dhe, mbi të gjitha, të arrinte një ditë të përballej me njerëzit që i kishin dhënë jetën.
Shqiponja kishte folur edhe për mundësinë e një takimi me prindërit biologjikë, duke treguar se si e imagjinonte atë moment pas më shumë se 20 vitesh pa asnjë kontakt.
Historia e saj pati edhe një ndikim të veçantë përtej rrëfimit personal. Sipas “Prive By LS”, publikimi i intervistës ndihmoi në ribashkimin e një nëne me vajzën e saj, të cilat kishin qenë të ndara për plot 20 vite.
Tashmë, Shqiponja ka nisur një kapitull të ri si konkurrente e BBVK 5, ku do të ndajë eksperiencën me 20 banorë të tjerë. Mbetet për t'u parë nëse gjatë qëndrimit në shtëpi ajo do të zbulojë më shumë detaje për historinë e saj dhe kërkimin e familjes biologjike.
