Dy prej figurave më të shquara të letërsisë shqiptare, Ismail Kadare dhe Dritëro Agolli, janë nderuar në një aktivitet të veçantë të zhvilluar në Pekin.
Ky organizim, i realizuar nga Ambasada e Shqipërisë në Kinë dhe Katedra e Gjuhës Shqipe në Universitetin e Studimeve Ndërkombëtare të Pekinit, mblodhi së bashku diplomatë, studiues dhe studentë, të cilët vlerësuan kontributin dhe ndikimin e dy autorëve në kulturën shqiptare dhe më gjerë.
Me temën “Dritëro Agolli dhe Ismail Kadare, dy kolosët e letërsisë dhe kulturës shqiptare”, aktiviteti solli në fokus jo vetëm krijimtarinë e tyre, por edhe rolin që letërsia shqipe luan si një urë lidhëse mes kulturave. U theksua se përmes veprave të tyre, Shqipëria prezantohet në botë jo vetëm si një vend, por si një identitet i pasur kulturor dhe historik.
Gjatë fjalës së tij, drejtuesi i Katedrës së Gjuhës Shqipe, Wang Caixiao, nënvizoi rëndësinë e letërsisë shqiptare si një dritare për të kuptuar më thellë vendin tonë, ndërsa ambasadori shqiptar në Kinë, Riza Poda, vlerësoi ndikimin që veprat e Kadaresë dhe Agollit kanë pasur në prezantimin e shpirtit dhe traditave shqiptare në arenën ndërkombëtare.
Aktiviteti u shoqërua me shfaqje dokumentarësh dhe interpretime artistike nga studentët, të cilët sollën fragmente nga krijimtaria e dy shkrimtarëve, duke i dhënë një dimension emocional dhe artistik kësaj mbrëmjeje.
Ky përkujtim në Pekin dëshmoi edhe një herë se veprat e Ismail Kadare dhe Dritëro Agolli vazhdojnë të jetojnë përtej kufijve, duke mbetur pika referimi për lexues dhe studiues në mbarë botën.
