Përgatitjet për nisjen e reality show-t Ferma VIP janë drejt fundit, por një veprim i fundit në rrjetet sociale ka ndezur diskutime mes ndjekësve. Faqja zyrtare e programit në Instagram publikoi një sondazh ku u kërkohej fansave të zgjidhnin ditët e transmetimit të spektaklit live.
Në sondazh u propozuan dy alternativa: “E hënë – E premte” ose “E martë – E shtunë”. Opsioni i dytë tërhoqi vëmendjen pasi përkon me ditët kur transmetohet Big Brother VIP Albania në Top Channel, çka u interpretua nga shumë ndjekës si një sfidë e drejtpërdrejtë mes dy formateve.
Interesi për këtë përballje bëhet edhe më i madh duke qenë se moderatore e Ferma VIP do të jetë Arbana Osmani, e cila për vite me radhë ishte figura kryesore e Big Brother VIP Albania. Prej kohësh në media janë përfolur edhe tensione mes saj dhe ish-televizionit ku punonte.
Megjithatë, rezultatet e sondazhit tregojnë se shumica e publikut nuk preferon një përplasje direkte mes dy spektakleve. Rreth 66% e votuesve zgjodhën variantin “E hënë – E premte”, ndërsa vetëm 34% votuan për opsionin që do ta vendoste programin në të njëjtin orar me BBV.
Kjo tregon se shumë ndjekës do të preferonin që dy reality show-t të transmetohen në ditë të ndryshme, në mënyrë që të mund t’i ndjekin të dy pa pasur nevojë të zgjedhin mes tyre.
