Teksa “Big Brother VIP Albania 6” po afron, interesi për personazhet që mund të bëhen pjesë e edicionit të ri po rritet. I ftuar në emisionin “She’s On Air” në Top Albania Radio, gazetari Bledi Mane ka zbuluar disa prej figurave që ai personalisht do të dëshironte t’i shihte brenda shtëpisë së “BBV”.
Në listën e tij janë Milaim Zeka, Helga Cako dhe deputeti socialist Erion Braçe.
Një prej emrave të parë të përmendur nga Mane ishte Milaim Zeka. Sipas gazetarit, figura e njohur nga Kosova do të sillte diskutime dhe dinamika interesante nëse do të bëhej pjesë e formatit.
Mane përmendi gjithashtu Helga Cakon, vajzën e Alfred Cakos. Duke folur për një pjesëmarrje të mundshme të saj, ai solli në vëmendje edhe marrëdhënien me të atin dhe mënyrën se si ai mund ta komentonte e mbështeste rrugëtimin e së bijës nga jashtë shtëpisë.
“Ka një lidhje të fortë familjare”, u shpreh Mane.
Por surpriza në listën e gazetarit ishte një emër nga politika. Bëhet fjalë për deputetin e Partisë Socialiste, Erion Braçe, të cilin Mane tha se do të dëshironte ta shihte në një realitet krejt ndryshe nga ai politik.
“Nuk e njohim pjesën njerëzore”, deklaroi Mane, duke argumentuar se një format si “Big Brother VIP” do t’i jepte publikut mundësinë të shihte një tjetër anë të figurës së Braçes.
Megjithatë, emrat e përmendur nga Bledi Mane mbeten dëshira personale të tij dhe nuk përbëjnë konfirmime për kastin e BBV6.
Sa i përket mundësisë për t’u rikthyer vetë në shtëpinë e “Big Brother VIP”, Mane e ka përjashtuar këtë opsion, duke argumentuar se formati ka nevojë për personazhe të rinj.
