Një fotomontazh satirik që u përhap me shpejtësi në rrjetet sociale është kthyer në shkak për një debat të fortë mes Çiljeta Xhilagës dhe Gjergj Lekës.
Në imazhin që qarkulloi online pretendohej në mënyrë të rreme se Presidenti Bajram Begaj i kishte akorduar Çiljetës titullin “Mjeshtre e Madhe e Punës”. Edhe pse bëhej fjalë për një montazh humoristik, postimi u komentua gjerësisht dhe shkaktoi reagime të shumta.
Mes tyre ishte edhe ai i Gjergj Lekës, i cili e cilësoi fotomontazhin si “sarkazmën e vitit”. Ai shtoi se, nëse lajmi do të ishte i vërtetë, do të ishte “dita më e turpshme e presidentit shqiptar”.
Komenti i kompozitorit nuk mbeti pa përgjigje. Çiljeta Xhilaga reagoi përmes rrjeteve sociale, duke sqaruar se nuk kishte marrë asnjë dekoratë dhe se gjithçka ishte një lajm i rremë.
Këngëtarja kritikoi ashpër tonin e përdorur nga Gjergj Leka, duke theksuar se nuk e priste një reagim të tillë nga një artist dhe duke i kujtuar rrugëtimin e saj në muzikë, televizion dhe aktrim. Ajo u shpreh krenare për karrierën e ndërtuar ndër vite dhe nuk ngurroi t’i drejtohej me fjalët:
“Të të vijë turp nga vetja.”
Pas reagimit të Çiljetës, Gjergj Leka iu përgjigj sërish, duke theksuar se e respekton atë si person, por jo kontributin e saj artistik në muzikën shqiptare. Ai shtoi se, sipas tij, shijet muzikore të këngëtares janë përmirësuar vitet e fundit dhe i uroi suksese në vijim.
Përplasja mes dy artistëve ka marrë vëmendje të madhe në rrjetet sociale, ku ndjekësit janë ndarë në mendime, me shumë prej tyre që kanë mbështetur njërën ose tjetrën palë në këtë debat publik.
