Rrjetet sociale janë përfshirë nga polemika pas publikimit të disa imazheve ku pretendohej se shfaqej Hatixhe Brika në gjendje komprometuese. Pamjet u shpërndanë me shpejtësi në platforma si WhatsApp dhe rrjete të tjera, duke nxitur reagime të shumta nga ndjekësit.
Pas përhapjes së tyre, vetë influencerja reagoi publikisht, duke i mohuar kategorikisht pretendimet dhe duke theksuar se bëhet fjalë për materiale të manipuluara. Sipas saj, imazhet janë krijuar me anë të inteligjencës artificiale dhe nuk përfaqësojnë realitetin.
Hatixhe Brika ka bërë të ditur se i është drejtuar Policisë së Shtetit, konkretisht sektorit të krimit kibernetik, për të denoncuar rastin dhe për të identifikuar personat përgjegjës për shpërndarjen e këtyre materialeve.
Hatixhe Brika via Instagram Story
Në reagimin e saj, ajo ka kritikuar mënyrën se si disa media dhe portale kanë trajtuar çështjen, duke theksuar se përhapja e materialeve të pavërteta dëmton jo vetëm imazhin e saj, por edhe familjen dhe njerëzit e afërt.
Ajo gjithashtu ka bërë thirrje që lajme të tilla të verifikohen përpara publikimit dhe të mos u jepet hapësirë personave keqdashës që, sipas saj, përdorin metoda të tilla për të dëmtuar të tjerët.
