Një postim i Brikena Selmanit për partnerin e saj, Mateo Borri, ka shkaktuar debat të madh në rrjetet sociale, duke nxitur reagime të shumta nga ndjekësit. Mes personave që kanë kritikuar publikisht mesazhin e saj është edhe ish-banorja e “Big Brother VIP Kosova 3”, Xheneta Fetahu.
Gjithçka nisi pasi Brikena publikoi një fotografi ku shfaqej e veshur me një bluzë me mbishkrimin “Jam pronë private e Mateo Borrit”. Krahas imazhit, ajo shkroi “Kur do ta kuptoni?”, duke etiketuar edhe partnerin e saj.
Brikena Selmani via Instagram Story
Megjithatë, kjo shprehje nuk është pritur mirë nga Xheneta, e cila ka reaguar përmes një postimi në Instagram, duke e lidhur mesazhin e Brikenës me ngjarjen e rëndë të Arlinda Zekajt, e cila u vra së fundmi në Pejë.
“Kosova hala e tronditun prej rastit të Arlindës, e dikush sot na del me ‘jam pronë e të dashurit’. WTF, moj motër?! Njeri s’osht pronë as e prindit t’vet, e le mo e dashurit!”, ka shkruar Xheneta.
Në vijim të reagimit të saj, ish-banorja e BBVK-së ka kritikuar mënyrën se si përdoren shprehje të tilla në marrëdhëniet në çift. Sipas saj, dashuria nuk duhet të ngatërrohet me pronësinë apo kontrollin ndaj partnerit.
“Dashnia s’osht pronësi, e lidhja s’ta jep të drejtën me pretendu që dikush t’përket ty. Pikërisht këto mentalitete duhet me i thy, jo me i romantizu”, është shprehur ajo.
Xheneta ka theksuar gjithashtu se, edhe kur deklarata të tilla bëhen me shaka apo si një mënyrë për të shprehur dashurinë, ato mund të përcjellin mesazhe të gabuara për raportin mes dy partnerëve.
“Se sot e thua për story, nesër dikush e merr si të drejtë me kontrollu jetën e tjetrit. Na duhet me kuptu që partner jemi, jo pronarë të njani-tjetrit”, ka përfunduar ajo.
Xheneta Fetahu via Instagram Story
Debati ka marrë vëmendje të veçantë pasi vrasja e Arlinda Zekajt ka rikthyer në qendër të diskutimit publik çështjen e dhunës ndaj grave në Kosovë dhe mentalitetin e kontrollit në marrëdhëniet në çift.
Postimi i Brikenës dhe reagimi i Xhenetës kanë hapur diskutime në rrjetet sociale mbi mënyrën se si shprehet dashuria dhe kufirin mes një deklarate simbolike dhe mesazheve që mund të normalizojnë idenë e pronësisë në një marrëdhënie.
Ndërkohë, Brikena Selmani nuk ka reaguar ende publikisht ndaj kritikave të Xheneta Fetahut, duke lënë të hapur diskutimin që ka përfshirë ndjekësit në rrjetet sociale.
