Historia e dashurisë mes Dove Cameron dhe Damiano David nisi në mënyrë krejt të papritur. Dy artistët u takuan për herë të parë backstage në MTV Video Music Awards 2022, ku Dove fitoi çmimin “Best New Artist”, ndërsa Måneskin, grupi italian i drejtuar nga Damiano, ishte gjithashtu i nominuar.
“Grupi më uroi për fitoren, por Damiano mezi më foli dy fjalë”, kujton Dove. Ajo bisedoi shkurtimisht me pjesëtarët e tjerë të grupit dhe vazhdoi mbrëmjen e saj.
Një vit më vonë, rrugët e tyre u kryqëzuan sërish në të njëjtin event. Këtë herë, Damiano iu afrua Dove për të folur rreth një kënge që kishin punuar virtualisht disa muaj më parë. Të dy ishin beqarë dhe energjia mes tyre kishte ndryshuar.
Damiano e ftoi Dove të ndiqte koncertin e Måneskin në Madison Square Garden dhe më pas të merrte pjesë në festën pas koncertit. “Gjithçka u zhvillua shumë shpejt që nga ai moment”, tregon këngëtarja.
Në tetor 2025, pak më shumë se dy vite pas takimit të tyre të parë, Damiano i propozoi Dove-s në shtëpinë e tyre në Los Angeles.
“Ishte shumë intime dhe speciale”, shprehet ajo.
Çifti zgjodhi Italinë, vendin e origjinës së Damianos, për të zhvilluar ceremoninë. Aktualisht, ata ndajnë jetën mes Los Angeles-it dhe Romës, ku preferojnë një jetë më të qetë, larg vëmendjes mediatike, pranë familjes dhe miqve të ngushtë të Damianos.
Për organizimin e dasmës, ata bashkëpunuan me organizatoren e njohur Alessandra Grillo dhe përfundimisht zgjodhën Toskanën si sfondin e përsosur për festimet.
“Është një proces shumë emocionues dhe i vështirë. Shumë gjëra dukeshin sikur nuk ishin reale. Kaluam shumë kohë duke menduar për detajet, lulet, ftesat dhe mënyrën se si do të rridhte e gjithë fundjava”, rrëfen Dove.
Baza e festimeve ishte Castiglion del Bosco, resorti Rosewood i vendosur në kodrat pranë Montalcinos, një pronë me histori mbi 1,000-vjeçare.
“Donim që gjithçka të ishte romantike dhe intime, por njëkohësisht të ishte një festë e madhe dhe argëtuese për të gjithë”, thotë këngëtarja.
Një garderobë martesore tërësisht italiane
Me stilin e saj të guximshëm dhe shpesh me elemente gotike, Dove dhe stilisti i saj Marc Eram kishin përgatitur një garderobë të veçantë për çdo moment të fundjavës.
Për ceremoninë civile në Montalcino, ajo zgjodhi një kostum martesor të personalizuar nga Giorgio Armani, në ngjyrë të bardhë fildishi, të shoqëruar me një pelerinë dramatike deri në tokë.
Më pas, për darkën në Castiglion del Bosco, ajo ndërroi veshje dhe zgjodhi një fustan më të gjallë nga Blumarine, perfekt për të kërcyer.
Në festën e mirëseardhjes, Dove u shfaq me një kostum Alberta Ferretti, të kombinuar me një varëse prej ari të bardhë dhe diamantesh nga Damiani.
Ndërsa për festën pas dasmës, ajo veshi një mini-fustan të mbuluar me rruaza dhe temina, të dizajnuar nga Fausto Puglisi për Roberto Cavalli, i cili shkëlqente nën dritat e diskos.
Megjithatë, veshja kryesore e dasmës ishte ajo që mori më shumë vëmendje. Për ceremoninë e së shtunës, zgjedhja e parë e Dove ishte Valentino, dhe shtëpia e modës, së bashku me drejtorin kreativ Alessandro Michele, pranuan menjëherë të realizonin ëndrrën e saj.
“Doja një pamje eterike, me shumë lëvizje, diçka që të lëvizte ndërsa ecja, por pa pasur shumë material”, shpjegon Dove.
Veli i saj, rreth katër metra i gjatë, ishte i qëndisur me kristale dhe mikro-rruaza që krijonin forma yjësish. Ky detaj ishte një referencë për emrin e saj të dytë, Celeste.
“Doja diçka qiellore që të përshtatej me një pjesë të tematikës së dasmës. Donim që të shkëlqente kur rrezet e diellit ta preknin dhe të krijonte një ndjesi surrealiste ndërsa ecja drejt altarit”, tregon ajo.
Damiano, nga ana tjetër, bashkëpunoi me stilistin e tij prej vitesh, Michele Potenza.
Për ceremoninë civile, ai veshi një kostum fildishi me dy kopsa nga marka romake Giuliva Heritage.
Në ceremoninë e mirëseardhjes, ai zgjodhi një look nga Valentino, krijuar nga Alessandro Michele, me një xhaketë krem, pantallona blu të errët dhe një shall burgundy rreth qafës.
Për ceremoninë kryesore, zgjedhja ishte Giorgio Armani.
“Doja një kostum shumë klasik për dhëndrin. Trepjesësh, me një rresht kopsash, mansheta dhe gjithçka tjetër. Armani ishte partneri perfekt për këtë”, tha Damiano.
Pamjen e kompletoi me një karficë luksoze Bvlgari, mansheta Bvlgari dhe një orë Audemars Piguet, e huazuar posaçërisht nga muzeu privat i markës për këtë event.
Tri ditë festime në Toskanë
Fundjava e dasmës nisi të enjten, më 24 shtator, pikërisht tre vite pas takimit të tyre të parë romantik.
Ceremonia civile u zhvillua në Montalcino, në prani të familjarëve dhe miqve më të afërt. Çifti mbërriti me një Lancia të bardhë vintage, duke përshkuar rrugicat me kalldrëm të qytetit mesjetar.
Në Palazzo dei Priori, Dove dhe Damiano shkëmbyen betimet civile nën tingujt e një versioni me tre instrumente të këngës “Hallelujah” të Leonard Cohen. Dëshmitare e Dove ishte mikja e saj më e mirë, Veronica St. Clair.
Më pas, të ftuarit u kthyen në Castiglion del Bosco, ku darkuan në një bodrum sekret të resortit, me atmosferë të ngjashme me një bibliotekë të errët. Risotto, muzika live dhe vallëzimet vazhduan deri vonë gjatë natës.
Të premten u zhvillua darka zyrtare e mirëseardhjes. Një tavolinë e gjatë ishte vendosur mes vreshtave dhe ishte dekoruar me mbulesa sateni në ngjyrë të kuqe vere, statuja engjëjsh, shandanë argjendi dhe tufa rrushi të kuq.
Damiano e përshkroi atë si “tavolina e ëndrrave të Dove”.
Në menu kishte mozzarella të freskët bufalo dhe pjata të mëdha me paccheri al pomodoro.
Ceremonia kryesore në kështjellën mesjetare
Të shtunën erdhi momenti kryesor.
Alessandra Grillo dhe ekipi i saj transformuan rrënojat e kështjellës origjinale të shekullit XII në Castiglion del Bosco. Tarracat dhe shkallët prej guri u zbukuruan me copa të gjata pëlhure të bardhë, gjelbërim, lule të bardha hortensie dhe zambakë calla.
Mes të ftuarve ishin edhe pjesëtarët e tjerë të Måneskin.
Dove hyri në ceremoni krah nënës së saj, Bonnie, për t’iu bashkuar Damianos në altar.
Ceremoninë e drejtoi Kenny Ortega, regjisori që ka punuar me Dove në trilogjinë e parë të filmave “Descendants”.
Çifti shkëmbeu betimet dhe përdori një frazë që ka një rëndësi të veçantë në historinë e tyre të dashurisë: “The best part of being alive”.
Kjo fjali është gdhendur edhe në unazat e fejesës së çiftit dhe ishte qëndisur brenda korsesë së fustanit Valentino të Dove.
“Ka shumë emocione kur je gati të ecësh pas gjithë asaj përgatitjeje, por sapo arrin atje, nuk mendon për asgjë tjetër. Është thjesht prani dhe gëzim”, tregon Dove.
E vetmja gjë që do të kishte dashur ndryshe? “Gjithçka kaloi kaq shpejt. Nuk doja që të mbaronte kurrë!”
Pas ceremonisë, të ftuarit u mblodhën në sheshin e një fshati historik mesjetar, ku ishin vendosur tavolina të gjata të ndriçuara me qirinj dhe të dekoruara me trëndafila të bardhë.
Nëna dhe motra e nuses mbajtën fjalime emocionuese, ndërsa më pas erdhi momenti i prerjes së tortës së madhe, të dekoruar me fruta dhe lule të freskëta, e përgatitur nga pastiçierja milaneze Mami Louise.
“Nuk kam ndjerë kurrë kaq shumë gëzim dhe dashuri në jetën time”, rrëfen Dove.
Mbrëmja vazhdoi me ushqim, pije, fjalime dhe shumë vallëzim.
Më vonë, nusja ndërroi sërish veshje dhe u shfaq me fustanin e saj Roberto Cavalli, të kombinuar me çorape me lidhëse dhe këpucë Jimmy Choo.
Çifti dhe të ftuarit u zhvendosën në një serë në pronën e resortit, ku festa vazhdoi me kokteje Martini dhe muzikë nga DJ Nicky Macha deri në orët e vona.
Dhe si ndihen Dove Cameron dhe Damiano David pas gjithë këtyre festimeve?
Përgjigjja e Dove është e shkurtër: “Jemi në qiellin e shtatë.”
/vogue
