Arbana Osmani dhe Top Channel janë rikthyer në qendër të vëmendjes javët e fundit, pas disa zhvillimeve që nxitën aludimet për një afrimitet të ri mes moderatores dhe televizionit.
Gjithçka nisi kur u vu re se Arbana kishte nisur të ndiqte sërish në Instagram Ledion Liçon, si edhe Sara dhe Lori Hoxhën. Lëvizja u komentua gjerësisht në rrjetet sociale dhe u interpretua si një sinjal se marrëdhëniet mes tyre mund të ishin përmirësuar pas një periudhe të gjatë distance.
Kjo solli edhe aludimet për një rikthim të mundshëm të Arbanës në Top Channel, televizion ku ajo ndërtoi një pjesë të rëndësishme të karrierës së saj dhe drejtoi formate të njohura, përfshirë “Big Brother VIP Albania”.
Megjithatë, një detaj i fundit duket se ka shtuar pikëpyetjet.
Në festën e 25-vjetorit të Top Channel, ku ishin të pranishme shumë prej figurave që kanë qenë pjesë e historisë së televizionit, Arbana Osmani nuk ishte e pranishme.
Mungesa e saj u vu re veçanërisht për shkak të zërave të fundit për një afrim me drejtuesit dhe një rikthim të mundshëm në ekran.
Deri tani, ndjekjet në Instagram nuk janë shoqëruar me ndonjë konfirmim publik për rikthimin e saj profesional në Top Channel. Ato mund të tregojnë se raportet personale janë normalizuar, por mungesa në një event të rëndësishëm të televizionit e lë ende të paqartë nëse bëhet fjalë për një rikthim të afërt.
Në të njëjtin event mungoi edhe Bora Zemani, emri i së cilës është përfolur së fundmi në lidhje me të ardhmen e saj televizive.
Për momentin, rikthimi i Arbanës në Top Channel mbetet i pakonfirmuar, ndërsa zhvillimet e ardhshme pritet të tregojnë nëse afrimiteti i fundit do të shndërrohet edhe në një bashkëpunim profesional.
