Joz Marku ka reaguar për herë të parë pas përplasjes së bujshme me Edi Kuçin dhe publikimit të videove që kanë qarkulluar gjerësisht në rrjet.
Në një deklaratë që ka habitur ndjekësit, këngëtari ka pretenduar se ajo që është parë në pamje nuk ka qenë një konflikt i vërtetë, por një situatë e inskenuar.
“Asgjë s’ka ndodhur, jemi aktorë, e kemi bërë vetë!”, është shprehur Jozi, duke lënë të kuptohet se përballja me Edin ka qenë e planifikuar.
Ai ka reaguar gjithashtu ndaj raportimeve se Prokuroria Themelore në Pejë ka hapur rast lidhur me incidentin dhe se është kërkuar arrestimi i tij.
“Lajmet për urdhër-arrest janë fake, nuk kam arsye të jem atje”, deklaroi këngëtari.
Reagimi i Jozit vjen pasi Klan Kosova raportoi për hapjen e rastit nga Prokuroria e Pejës. Sipas raportimit, informacioni ishte konfirmuar nga Shkodran Nikçi, zëdhënës i Prokurorisë Themelore në Pejë, ndërsa ishte raportuar edhe për një kërkesë për arrestimin e këngëtarit.
Ndërkohë, videot e publikuara tregojnë përballjen mes Jozit dhe Edit, ku situata duket se përshkallëzohet deri në kontakt fizik. Në një prej pamjeve, Jozi dëgjohet duke i kërkuar llogari Edit për disa deklarata të mëparshme ndaj tij.
Tashmë, deklarata e fundit e Jozit se gjithçka ishte “aktrim” ka hapur një tjetër pikëpyetje: a ishte ky një pretendim serioz apo një reagim ironik ndaj gjithë situatës?
Po ashtu, pretendimi i tij se raportimet për procedurat ndaj tij janë “fake” bie në kontrast me informacionin e raportuar nga Klan Kosova dhe të atribuuar zyrtarëve të Prokurorisë së Pejës.
