Historia mes Brikena Selmani dhe Mateo Borri po merr çdo ditë zhvillime të reja, ndërsa detajet e fundit po i bindin fansat se ndarja mes tyre është reale.
Pas fshirjes së fotove të përbashkëta dhe “unfollow”-it në Instagram, tashmë kanë dalë edhe dëshmi nga persona që pretendojnë se kanë parë nga afër largimin e Brikenës nga banesa ku qëndronte me Mateon në Tiranë.
Sipas një fqinji të çiftit, pasditen e së enjtes Brikena Selmani është parë duke hyrë dhe dalë disa herë nga apartamenti për të marrë sendet e saj personale.
Dëshmitari pretendon se gjatë gjithë kësaj kohe, Mateo Borri ka qëndruar në ballkon duke pirë cigare, pa komunikuar me të dhe pa e ndihmuar.
Sipas të njëjtit burim, rreth 30 minuta më vonë ka mbërritur një taksi, ku shoferi e ka ndihmuar Brikenën të ngarkonte çantat, ndërsa Mateo nuk ka lëvizur nga ballkoni deri në momentin që makina është larguar.
Këto detaje kanë ndezur menjëherë rrjetin, ku shumë ndjekës po e komentojnë situatën si një ndarje të ftohtë dhe pa kthim pas.
Megjithatë, deri tani as Brikena Selmani dhe as Mateo Borri nuk kanë bërë një deklaratë zyrtare për të konfirmuar publikisht fundin e marrëdhënies së tyre.
