Këngëtarja Xhensila Myrtezaj është përballur me një incident të pakëndshëm gjatë një prej koncerteve të saj të fundit, kur një fans ka tentuar ta puthë pa dëshirën e saj, teksa ajo po performonte pranë publikut.
Në videon që po qarkullon në rrjetet sociale, shihet momenti kur një i ri i zgjat dorën këngëtares, e kap nga pjesa e pasme e kokës dhe përpiqet ta tërheqë drejt vetes për ta puthur.
Reagimi i Xhensilës ka qenë i menjëhershëm. Këngëtarja ia ka larguar dorën dhe është tërhequr disa hapa pas, duke i bërë të qartë se veprimi i tij ishte i papranueshëm. E revoltuar nga kjo sjellje e papritur, ajo ka ndërprerë për disa çaste performancën dhe i është drejtuar të riut me fjalët: “Kadal, kadal more!”
Momenti është filmuar dhe shpërndarë në internet, duke tërhequr vëmendjen e përdoruesve. Ndërsa disa prej të pranishmëve kanë reaguar me të qeshura, këngëtarja nuk e ka fshehur pakënaqësinë ndaj veprimit të fansit, i cili tentoi të kalonte kufijtë e saj personalë.
Pavarësisht incidentit, Xhensila Myrtezaj ka vijuar koncertin, duke rifilluar performancën pas reagimit të menjëhershëm. Këngëtarja nuk ka lejuar që situata e pakëndshme të ndërpriste më tej mbrëmjen muzikore.
