Ish-konkurrentja e “Ferma VIP”, Vanesa Sono, ka folur hapur për situatën e krijuar pas letrës së ndarjes që mori nga Indriti gjatë spektaklit Prime. E ftuar në një intervistë televizive, ajo la të kuptohet se e konsideron këtë histori të mbyllur dhe nuk sheh ndonjë arsye konkrete për të zhvilluar një takim apo ballafaqim me të jashtë programit.
E pyetur nëse do të kishte një mundësi për sqarime mes tyre pas përfundimit të eksperiencës në fermë, Vanesa u shpreh se letra e bërë publike kishte dhënë tashmë përgjigjet e nevojshme dhe se nuk mendon se ka mbetur diçka tjetër për t’u diskutuar. Sipas saj, ajo e ka pranuar vendimin e marrë nga Indriti dhe është e fokusuar për të vazhduar përpara.
Gjatë intervistës, Vanesa u ndal edhe te marrëdhëniet që dëshiron të ruajë apo të ndërpresë pas formatit. Kur iu kërkua të përmendte personat me të cilët nuk do të dëshironte të kishte më kontakt, ajo përfshiu edhe Indritin në këtë listë, duke lënë të kuptohet se raporti mes tyre ka marrë fund përfundimisht.
Kjo deklaratë vjen pas zhvillimeve të shumta që pasuan eliminimin e saj nga gara, kur Indriti shprehu interes për një tjetër banore dhe deklaroi se kjo kishte ndikuar në vendimin e tij për t’i dhënë fund lidhjes me Vanesën. Për momentin, gjithçka tregon se rrugët e tyre do të mbeten të ndara edhe jashtë programit.
