Prezenca e fundit e MC Kresha në emisionin Goca dhe Gra është shoqëruar me një atmosferë të dukshëm të tensionuar, sidomos në raport me bashkëprezantuesen Rozana Radi.
Gjatë bisedës në studio, edhe pse temat kryesore ishin muzika dhe projektet e reperit, vëmendjen e mori marrëdhënia e ftohtë mes dy personazheve. Kamerat kanë evidentuar mungesë komunikimi, mungesë kontakti me sy dhe një distancë të qartë emocionale mes tyre.
Situata u bë edhe më e dukshme kur Rudina Dembacaj ndërhyri me një pyetje direkte për raportin mes tyre, duke shtuar edhe më shumë siklet në studio. MC Kresha u përgjigj shkurt, duke shmangur çdo thellim në temë.
Në fund të emisionit, Rozana Radi theu heshtjen, duke u shprehur se qëndrimi i saj lidhej me respektin ndaj partnerëve aktualë të jetës dhe me faktin se përzgjedhja e të ftuarve nuk varet nga ajo. Megjithatë, ajo vlerësoi aftësitë artistike të reperit.
Ky moment u lidh menjëherë nga publiku me të kaluarën e tyre sentimentale, pasi dyshja kanë pasur një lidhje disa vjeçare që përfundoi rreth vitit 2012. Në atë periudhë, ata kishin bashkëpunuar edhe artistikisht me këngën “Jaba Daba Du” në Kënga Magjike.
