Gazetari Elton Tozaj ka paralajmëruar një tjetër publikim për Erion Isain, kryetarin e Bashkisë së Kolonjës, duke bërë të ditur se në materialet që pretendon se disponon përfshihet edhe një këngëtare shumë e njohur.
Përmes një postimi në Instagram, Tozaj ka shkruar: “Dhe një këngëtare shumë e njohur e përfshirë në pisllëqet e Erion Isait! Sonte ora 22:00”. Megjithatë, ai nuk ka zbuluar emrin e artistes dhe as detaje të tjera mbi natyrën e pretendimeve.
Paralajmërimi vjen vetëm disa orë pasi Tozaj publikoi materiale të tjera dhe ngriti akuza ndaj kryebashkiakut të Kolonjës. Ai pretendon se Isai u ka kërkuar favore seksuale punonjësve meshkuj të bashkisë, ndërsa ka deklaruar se disponon edhe emrat e personave që, sipas tij, janë të përfshirë.
Në publikimet e tij, Tozaj ka shpërndarë gjithashtu pamje të disa bisedave private, të cilat pretendon se i përkasin Isait dhe një personi tjetër. Në to shfaqet një profil me emrin e kryebashkiakut dhe komunikime me përmbajtje intime. Autenticiteti i këtyre materialeve nuk është konfirmuar në mënyrë të pavarur.
Tashmë, vëmendja është përqendruar te publikimi i paralajmëruar për orën 22:00, ku Tozaj thotë se do të zbulojë më shumë edhe për këngëtaren e njohur. Deri në këto momente, ai nuk ka dhënë identitetin e saj dhe mbetet e paqartë se çfarë lidhjeje pretendon se ka artistja me çështjen.
Ndërkohë, Erion Isai nuk ka reaguar publikisht lidhur me autenticitetin e materialeve të publikuara nga Tozaj apo për akuzat e ngritura ndaj tij.
