Roza Lati ka zbuluar një prapaskenë të papritur lidhur me ftesën për t’u bërë pjesë e reality show-t “Ferma VIP”, ku ishte ftuar së bashku me nënën e saj, aktoren e njohur Rita Lati. Moderatorja ka treguar se të dyja vendosën ta refuzonin ofertën pasi mësuan se spektakli do të prezantohej nga Arbana Osmani.
E ftuar në emisionin “Me Nder Jush” në Andale Media, Roza foli për televizionin shqiptar dhe vlerësimin që, sipas saj, u mungon profesionistëve me përvojë.
“Profesionistët e vjetër nuk po marrin atë që meritojnë”, u shpreh ajo, duke përmendur disa figura që prej kohësh nuk janë të pranishme në ekran.
Gjatë bisedës, moderatorja përmendi edhe Albana Osmanin, ndërsa për Arbanën sqaroi se ajo vazhdon të jetë aktive në televizion përmes formatit “Ferma VIP”.
Pikërisht në këtë moment, Roza zbuloi se kishte marrë një ofertë për të marrë pjesë në spektakël së bashku me të ëmën, por vendimi i tyre ndryshoi sapo mësuan emrin e moderatores.
“Unë dhe mamin na kërkuan te Ferma dhe refuzuam kur mora vesh që ishte Arbana që prezantonte”, deklaroi Lati.
E pyetur për arsyen e këtij vendimi, Roza bëri dallimin mes aftësive profesionale të Arbanës dhe përshtypjes së saj për sjelljen e moderatores jashtë kamerave.
“Arbana para ekranit është shumë e mirë, por në prapaskenë është pak egoiste në drejtimin e ekranit, ka pak ego”, u shpreh ajo.
Sipas Rozës, oferta financiare ishte e konsiderueshme, por kjo nuk mjaftoi që ajo dhe nëna e saj të ndryshonin mendje dhe të pranonin pjesëmarrjen në reality show.
Gjatë intervistës, Lati foli edhe për mungesën e saj në ekranet televizive, duke shpjeguar se një nga arsyet lidhet me kushtet e bashkëpunimit që i janë propozuar. Ajo la të kuptohej se përvoja e saj shumëvjeçare e bën më të kujdesshme në zgjedhjen e projekteve ku vendos të angazhohet.
Deri tani, Arbana Osmani nuk ka reaguar publikisht ndaj deklaratave të Rozës. Mbetet për t’u parë nëse moderatorja do të japë një përgjigje lidhur me komentet e bëra për të.
