Kryeministri Edi Rama ka bërë një sërë deklaratash të forta lidhur me protestat në Tiranë, duke njoftuar një shpërblim prej 2,500 eurosh për çdo efektiv policie të angazhuar në terren dhe duke paralajmëruar pasoja për personat që, sipas tij, janë përfshirë në akte dhune.
Gjatë deklaratës së tij më 19 tetor, Rama bëri të ditur se shpërblimi do të jetë i njëjtë për të gjithë efektivët e angazhuar në përballimin e situatës, me qëllim që të mos ketë dallime mes tyre.
Kryeministri paralajmëroi gjithashtu rritje të konsiderueshme të pagave të Policisë së Shtetit nga 1 janari, në kuadër të buxhetit të ri, pa dhënë një shifër konkrete për masën e rritjes.
“Ne do të vëmë në dispozicion një shumë prej 2500 eurosh, për çdo efektiv në front. E vendosëm kështu, për të mos bërë asnjë diferencë. Jeni një, dhe një për të gjithë. Shteti do ta fitojë këtë betejë”, deklaroi Rama.
Një pjesë të rëndësishme të fjalës së tij, kryeministri ia kushtoi përfshirjes së të miturve në protestë. Ai paralajmëroi se familjet mund të përballen me pasoja financiare për dëmet e shkaktuara nga fëmijët e tyre, në rast se nuk mbajnë përgjegjësi për veprimet e tyre.
Rama u shpreh se dëmet ndaj trotuareve, semaforëve, kamerave, tabelave, stolave dhe hapësirave publike nuk duhet të paguhen nga taksat e qytetarëve.
Ai pati një mesazh edhe për studentët që, sipas tij, ushtrojnë dhunë ndaj policisë, duke paralajmëruar heqjen e bursave, arsimit falas dhe mbështetjes financiare nga shteti për personat që përfshihen në akte të tilla.
“Studentët që dalin dhe dhunojnë Policinë e Shtetit nuk do të kenë bursa, nuk do të kenë mbështetje financiare nga shteti”, u shpreh kryeministri.
Deklaratat e kryeministrit u përqendruan edhe te mësuesit, të cilët ai i akuzoi se kanë nxitur nxënësit të dëmtojnë ambientet shkollore gjatë protestave.
Duke iu referuar një rasti në Lezhë, Rama deklaroi se mësuesit e përfshirë në veprime të tilla nuk do të lejohen të rikthehen në arsim dhe nuk do të kenë më role në administratën shtetërore.
“Mësues, mësues që marrin nxënësit dhe i nxjerrin nga shkolla dhe u thonë: ‘Bini xhamave të shkollës’ [...] nuk do të marrin më asnjë lloj roli si punonjës të shtetit, kurrë më në shtet”, deklaroi ai.
Me këto paralajmërime, Rama ka ashpërsuar qëndrimin ndaj protestuesve dhe personave që akuzon për nxitje të dhunës, ndërsa situata në Tiranë vijon të jetë në qendër të debatit publik. Masat e paralajmëruara ndaj studentëve, familjeve dhe mësuesve do të duhet të vlerësohen në përputhje me procedurat dhe bazën ligjore përkatëse.
