Një tjetër situatë nga “Ferma VIP” po bën xhiron e rrjetit, pasi është publikuar videoja që moderatorja Arbana Osmani nuk lejoi të komentohej gjatë transmetimit live të spektaklit.
Gjatë “Prime”-it të fundit, mes debateve dhe tensioneve në shtëpi, Mimoza Ahmeti kërkoi të rikthehej tek një episod i ndodhur më herët, por Arbana ndërhyri menjëherë duke mos lejuar vazhdimin e diskutimit, pa dhënë detaje për publikun.
Tashmë në rrjetet sociale po qarkullon videoja në fjalë, ku shihet Fabjola Elezaj pranë shtratit ku ndodheshin Mimoza Ahmeti dhe Bujakan, teksa po i bënte masazh këmbëve këtij të fundit.
Në atë moment, Ola i drejtohet Mozës me fjalët: “E njifke dhe ti Magdalenën ë?”, një koment që u interpretua nga ndjekësit si ironik dhe provokues.
Referenca ndaj figurës biblike të Maria Magdalenës duket se ka qenë një nga arsyet që situata krijoi tension dhe më pas u shmang nga diskutimi gjatë spektaklit live, ndërsa videoja tashmë po komentohet gjerësisht në rrjet.
