Gazetari Elton Tozaj ka bërë një tjetër deklaratë lidhur me videot intime që kanë qarkulluar ditët e fundit në rrjet, duke pretenduar se është kontaktuar drejtpërdrejt nga aktorja Monika Lubonja.
Gjatë një daljeje në Klan Kosova, Tozaj deklaroi se Lubonja e ka telefonuar gjatë ditës dhe se biseda, sipas versionit të tij, lidhej me emrat e personave që janë përmendur në lidhje me materialet që po qarkullojnë.
Duke treguar atë që pretendon se i është thënë gjatë telefonatës, Tozaj u shpreh:
“Sot, Monika Lubonja më merr dhe më thotë: ‘Pse nuk i thua ti emrat e tjerë, por ke thënë vetëm këto emra?’”
Gazetari më pas komentoi telefonatën, duke ngritur shqetësimin e tij për mënyrën se si po trajtohet çështja pas publikimit të videove.
“Domethënë, këtu nuk shkojnë njerëzit të bashkëpunojnë me policinë dhe ta arrestojnë atë tipin që i ka filmuar dhe publikuar, por çohet gruaja e huaj dhe s’ka hallin e vet, por ka hallin pse nuk i publikon emrat e tjerë”, u shpreh Tozaj.
Emri i Monika Lubonjës ka qenë ndër më të përfolurit në rrjet që prej nisjes së shpërndarjes së materialeve. Aktorja, ndërkohë, ka mbyllur komentet në postimet e saj në Instagram, pas komenteve dhe reagimeve të shumta.
Megjithatë, telefonata e pretenduar është bërë publike vetëm përmes rrëfimit të Elton Tozajt. Deri tani, Lubonja nuk ka konfirmuar publikisht se e ka telefonuar gazetarin dhe as nuk ka dhënë versionin e saj për bisedën e treguar prej tij.
Ndërkohë, mbetet për t’u verifikuar origjina e materialeve, si dhe identiteti i personave që i kanë regjistruar dhe më pas i kanë shpërndarë ato.
Sipas informacionit të paraqitur, Policia dhe strukturat e Krimit Kibernetik kanë nisur veprimet për të përcaktuar burimin dhe mënyrën e shpërndarjes së materialeve.
