Arjan Konomi ka publikuar një video në Instagram, përmes së cilës pretendon se është dhunuar fizikisht nga disa persona pranë banesës së tij. Në një reagim të ashpër, ai ka drejtuar akuza ndaj personave që i cilëson si të afërm të Linda Ramës, bashkëshortes së kryeministrit Edi Rama.
Sipas rrëfimit të Konomit, ngjarja ka ndodhur gjatë natës, në një lokal poshtë banesës së tij. Ai pretendon se disa persona iu afruan fillimisht me pretekstin se dëshironin të sqaronin një çështje me të, por situata më pas përfundoi në dhunë fizike.
“Si guxon të dërgosh kushërinjtë e tu të më zënë pritë mua natën poshtë banesës sime dhe të më qëllojnë me grushta?”, shprehet Konomi në video, duke iu drejtuar Linda Ramës.
Në videon e publikuar, Konomi tregon se personat në fjalë fillimisht janë ulur në tavolinë me të, por më pas, sipas tij, e kanë goditur.
“Më futën në kurth, se thanë ‘do sqarohemi dhe do flasim pak’. Pastaj u ulën në tavolinë me mua, morën dhe gotën dhe u ngritën dhe më qëlluan”, rrëfen ai.
Ai pretendon gjithashtu se ngjarja ka ndodhur në prani të personave të tjerë dhe kamerave të sigurisë, ndërsa thotë se ka marrë edhe kërcënime me jetë.
“Njerëz që më kërcënojnë mua se do më vrasin po dola në Evropë”, deklaron Konomi, duke shtuar se nuk kishte përjetuar më parë një situatë të tillë.
Gjatë reagimit të tij, Konomi përdor gjuhë të ashpër ndaj Linda dhe Edi Ramës, duke pretenduar se ngjarja lidhet me pakënaqësinë e disa familjarëve të bashkëshortes së kryeministrit.
Deri në momentin e publikimit të këtij lajmi, pretendimet e Arjan Konomit nuk janë verifikuar në mënyrë të pavarur. Në materialin e paraqitur nuk përfshihet një reagim nga Linda Rama apo Edi Rama lidhur me akuzat.
