Ngjarja e rëndë ku një 17-vjeçare u dhunua nga disa bashkëmoshatare në Fier, në një video që u bë virale në rrjetet sociale, ka shkaktuar reagime të forta në opinionin publik dhe mes figurave të njohura.
Mes tyre ka reaguar edhe Luiz Ejlli, i cili përmes një mesazhi të gjatë ka dënuar ashpër dhunën mes të rinjve, duke theksuar se përgjegjësia nuk bie vetëm mbi autorët, por mbi të gjithë shoqërinë.
“Ka ngjarje që nuk të lënë vetëm pa fjalë, të lënë pa frymë. Kur një fëmijë ngre dorën mbi një fëmijë tjetër, nuk ka dështuar vetëm ai, kemi dështuar të gjithë”, shkroi këngëtari.
Në reagimin e tij, Luiz Ejlli u ndal edhe te roli i familjes, shkollës dhe shoqërisë në edukimin e fëmijëve, duke paralajmëruar se indiferenca ushqen fenomene të tilla.
“Një shoqëri nuk shembet kur dëgjon britmat, shembet kur mësohet me to. Dhuna nuk lind brenda një dite. Ajo ushqehet nga indiferenca, nga urrejtja, nga mungesa e edukimit dhe nga bindja se poshtërimi të bën të fortë.
Trimëria nuk është të rrëzosh dikë që nuk mbrohet. Trimëria është të mos e lësh askënd vetëm.
Videot fshihen me një klikim, por plagët që lë poshtërimi nuk fshihen për vite të tëra. Një grusht zbehet me kohën, një shpirt i thyer mund të mbetet i plagosur përgjithmonë.
Fëmijët nuk kanë nevojë vetëm për shkolla që u mësojnë matematikë dhe gjuhë. Kanë nevojë për familje, mësues dhe një shoqëri që u mëson çfarë do të thotë të jesh njeri. Mos e ndani këtë histori vetëm për t’u indinjuar, ndajeni që të mos përsëritet.
Një komb nuk bëhet i madh nga stadiumet apo sheshet që mbush, por nga fëmijët që arrin të mbrojë. Dhuna nuk është kurrë forcë. Forca është ta ndalosh atë.”
Mesazhi i Luiz Ejllit është shpërndarë gjerësisht në rrjetet sociale, duke marrë mbështetjen e mijëra ndjekësve, të cilët kërkojnë më shumë ndërgjegjësim dhe masa konkrete për të parandaluar raste të tilla të dhunës mes të miturve.
