Publikimi i videove intime të kompozitorit Adi Hila ka ngritur diskutime të shumta edhe mbi mënyrën se si janë siguruar pamjet, si dhe mbi kamerat që kanë regjistruar ambientin.
Në emisionin “News24 Fundjavë”, eksperti i sigurisë Fatjon Softa analizoi pozicionimin e kamerave dhe bëri dallimin mes kamerave të sigurisë dhe atyre të fshehta.
Sipas Softës, mënyra e orientimit të një kamere mund të japë të dhëna për qëllimin e saj, megjithatë ai e paraqiti këtë si një vlerësim profesional, jo si një fakt të konfirmuar për rastin konkret.
“Kamerat e sigurisë duhet të ndahen nga kamerat e fshehta. Këto të dytat vendosen sepse prona jote mund të rrezikohet apo abuzohet. Kur e përdor si një ambient privat, gjërat ndryshojnë. Kamera ishte e drejtuar drejt krevatit, jo, për shembull, në drejtim të kasafortës”, tha Softa.
Duke u ndalur te pozicionimi i saj, eksperti ngriti pikëpyetje mbi qëllimin e mundshëm të vendosjes së kamerës.
“Nuk ka qëllime sigurie, por marrje të pamjeve. Fakti që kemi pamje filmike që kanë intimitet, tregon se qëllimi i vendosjes së kamerave ishte i ndryshëm nga ai i sigurisë”, u shpreh ai.
Megjithatë, këto janë vlerësime të ekspertit Softa dhe nuk përbëjnë një konfirmim se kamera ishte vendosur posaçërisht për të regjistruar pamje intime.
Softa foli gjithashtu për mundësinë e hakerimit të sistemit, duke theksuar se në një skenar të tillë do të duhej të përcaktohej mënyra se si është ndërhyrë në sistem dhe arsyeja.
“Nëse flasim për hakerim, duhet të flasim për pse. Kur flasim për hakerim, dikush ka hyrë në sistem dhe ka thyer kodin e sigurisë. Kur personi në fjalë thotë ‘nuk kam pasur filmim’, duhet parë se si është hakeruar”, deklaroi eksperti.
Sipas tij, pamjet e regjistruara nga kamerat zakonisht ruhen në sisteme arkivimi, ndaj nuk është e nevojshme që dikush të jetë duke e monitoruar kamerën në mënyrë të vazhdueshme.
“Nuk do të hyjë dikush 24 orë të kontrollojë një kamera që ke vendosur ti. Pamjet janë ruajtur diku si arkivë”, tha Softa.
Eksperti u ndal edhe te Telegrami, duke pretenduar se në platformë ekzistojnë grupe ku shpërndahen materiale të regjistruara nga kamera të fshehta. Sipas tij, pamje të tilla mund të shiten, publikohen apo përdoren edhe për shantazh.
“Në Telegram ka grupe të hapura që kanë kamera të fshehta për persona të ndryshëm. Pamjet shiten dhe publikohen, përdoren për shantazh”, u shpreh Softa.
Ndërkohë, rasti i publikimit të videove intime të Adi Hilës vijon të jetë në qendër të vëmendjes, ndërsa mënyra se si janë siguruar dhe më pas shpërndarë pamjet mbetet për t’u përcaktuar nga hetimet dhe provat përkatëse.
