Moderatorja Neda Balluku ka ndarë një mesazh emocional në rrjetet sociale, ku ka shprehur dhimbjen për mungesën e dy djemve të saj, Zait dhe Serzhit. Përmes një postimi të gjatë në Instagram, ajo ka rrëfyer ndjesitë dhe pritjen që, sipas saj, po përjeton prej kohësh si nënë që nuk ka mundur të takojë fëmijët.
Në shkrimin e saj, Neda përshkruan ndikimin që kjo mungesë ka në përditshmërinë e saj, duke e shoqëruar rrëfimin me fjalë që përcjellin lodhje, brishtësi dhe mall.
“Kur çunat nuk vijnë, mosha ime ndalet. Çdo rrudhë shfrytëzon ajrin që mungon dhe veten ripërtërin. Papritur unë jam më e re, më e vogël, më e dobët, më e brishtë, por më e lodhur, më në pritje, më e humbur dhe më pa shpresë. E megjithatë, ende nënë”, shkruan moderatorja.
Përtej dhimbjes së shprehur, ajo ndalet edhe te kujtimet e vogla që e lidhin me secilin prej djemve. Neda përmend buzëqeshjen e Zait kur e sheh dhe shprehjet e fytyrës së Serzhit, të cilat i kujtojnë ngjashmërinë e tij me të ëmën.
Në postimin e saj, moderatorja tregon gjithashtu se ka njerëz që e këshillojnë të mos i ndajë publikisht ndjenjat e saj. Megjithatë, ajo thekson se për të, asgjë nuk mund të ketë më shumë rëndësi sesa fëmijët e saj.
“Kur çunat nuk vijnë, të tjerët më pyesin se çfarë po pres. Të tjerët më thonë mos e shkruaj atë që ndjen. Të tjerët më thonë të tjera gjëra. Por askush dhe asgjë nuk vlen as sa çunat, qoftë edhe kur nuk vijnë. Edhe mungesa e tyre është prani”, përfundon ajo.
Ky rrëfim vjen pas ndarjes së Nedës nga ish-bashkëshorti i saj, Ogren Balluku, me të cilin, sipas raportimeve të mëparshme, ka pasur edhe mosmarrëveshje ligjore. Në janar të vitit 2026, të dy iu drejtuan gjykatës për urdhra mbrojtjeje, në kuadër të pretendimeve të ndërsjella për dhunë.
Në postimin e fundit, Neda ka zgjedhur të ndajë publikisht përjetimet e saj si nënë, ndërsa rrethanat e plota të situatës familjare dhe të takimeve me fëmijët mbeten të paqarta. Mesazhi i saj ka vënë në qendër mallin për dy djemtë dhe pritjen për t'i pasur sërish pranë.
