Edhe pse produksioni nuk ka zbuluar ende zyrtarisht emrat që do të jenë pjesë e “Big Brother VIP Kosova 5”, në rrjetet sociale kanë nisur të qarkullojnë spekulimet e para për moderatorët, opinionistët dhe banorët e mundshëm të edicionit të ri.
Këtë sezon, vëmendja nuk është përqendruar vetëm te personazhet që mund të hyjnë në shtëpi, por edhe te ndryshimet e mundshme në drejtimin e spektaklit.
Një prej emrave që po përflitet për moderimin e formatit është Bora Zemani, e cila mund të jetë në krah të moderatorit kosovar Alaudin Hamiti. Pas largimit të Jonida Vokshit, e cila drejtoi katër edicionet e mëparshme, ende nuk dihet se kush do ta shoqërojë Hamitin në sezonin e pestë.
Ndryshime të mundshme përfliten edhe në panelin e opinionistëve. Krahas Leonora Jakupit, e cila ishte pjesë e edicionit të kaluar, në listat jozyrtare është përfshirë edhe Shqipe Hysenaj, ish-banore e formatit.
Ndërkohë, edhe lista e personazheve që mund të bëhen pjesë e shtëpisë ka tërhequr vëmendje. Mes emrave që po qarkullojnë janë Ledion Grishaj, Bejta, Sheki, Nichi, Vjollca Haxhiu dhe Angel Spaho.
Lista vijon me gazetaren dhe influencuesen Zoja Nushi, këngëtarin Robert Berisha dhe influencuesen transgjinore Erina. Gjithashtu, Pranvera dhe Marjan janë përmendur si dy emra që mund të bëhen pjesë e këtij edicioni së bashku.
Sa i përket datës së nisjes, në raportimet që po qarkullojnë përmendet 19 tetori, por kjo datë nuk është konfirmuar ende zyrtarisht nga produksioni.
Për momentin, emrat e moderatorëve, opinionistëve dhe banorëve të mundshëm mbeten të pakonfirmuar. Se cilët prej tyre do të shfaqen realisht në edicionin e pestë të “Big Brother VIP Kosova”, pritet të zbulohet në ditët në vijim.
