Një lëvizje e papritur në rrjetet sociale ka rikthyer në qendër të vëmendjes raportin e Arbana Osmanit me Top Channel, televizionin ku moderatorja ndërtoi një pjesë të rëndësishme të karrierës së saj.
Për vite me radhë, Arbana ishte një prej figurave kryesore të “Big Brother Albania”, ndërsa më pas drejtoi edhe dy sezonet e para të “Big Brother VIP Albania”. Pas përfundimit të edicionit të dytë, ajo nuk u rikthye më në krye të formatit, ndërsa vendin e saj e mori Ledion Liço.
Arsyet e largimit të saj nuk u bënë asnjëherë plotësisht të qarta publikisht, ndërsa në media u përfol për një krisje të mundshme mes Arbanës dhe Top Channel. Dyshimet u shtuan edhe më shumë kur Arbana dhe Ledioni nuk ndiqnin më njëri-tjetrin në Instagram.
Por tani duket se diçka ka ndryshuar.
Arbana Osmani dhe Ledion Liço kanë nisur sërish të ndjekin njëri-tjetrin në Instagram. Jo vetëm kaq, pasi moderatorja rezulton të ndjekë edhe faqen zyrtare të Top Channel, si dhe Lori dhe Sara Hoxhën.
Dhe koha kur po ndodhin këto lëvizje është ajo që e bën situatën edhe më interesante.
Arbana sapo ka përfunduar drejtimin e sezonit të tretë të “Ferma VIP”, ndërsa një mesazh i saj pas finales ka ngritur pikëpyetje mbi të ardhmen e saj në këtë format.
“Finale. Faleminderit @therealholtagram që më dhe mundësinë të drejtoj këtë spektakël; do jetë një kujtim shumë i bukur. Faleminderit të gjithë atyre që punuan me shpirt në këto muaj, ju e dini cilët jeni dhe ju kam në zemër”, shkroi moderatorja.
Fjala “kujtim” nuk kaloi pa u vënë re. Për një pjesë të ndjekësve, formulimi i Arbanës tingëlloi si një mesazh përmbyllës, duke ngritur dyshimet se ajo mund të mos jetë më pjesë e “Ferma VIP” në sezonin e ardhshëm.
Megjithatë, nuk ka ende asnjë konfirmim zyrtar nga Arbana Osmani apo Vizion Plus se bashkëpunimi i saj me formatin ka përfunduar. Po ashtu, nuk ekziston deri tani ndonjë njoftim zyrtar për një rikthim të Arbanës në Top Channel.
Megjithatë, normalizimi i raportit virtual me Ledion Liçon, ndjekja e sërishme e Top Channel dhe afrimi në rrjetet sociale me motrat Hoxha kanë mjaftuar për të rikthyer një skenar që deri pak kohë më parë dukej i largët.
A po përgatitet Arbana Osmani për një rikthim në Top Channel?
Dhe pyetja që ngjall edhe më shumë kuriozitet është: nëse rikthehet, a mund ta shohim sërish në “Big Brother VIP Albania”, format me të cilin ajo u identifikua për vite me radhë?
Për momentin, gjithçka mbetet në kuadrin e spekulimeve dhe pikëpyetjeve. Por lëvizjet e fundit në Instagram, të ndodhura menjëherë pas përfundimit të “Ferma VIP 3”, kanë ndezur sërish kureshtjen për një prej rikthimeve më të shumëpërfolura të televizionit shqiptar.
