Pas kritikave dhe reagimeve të shumta në rrjet, si edhe shfaqjes së portretit të tij të shënjestruar gjatë protestave në Tiranë, Alban Skënderaj ka reaguar për herë të parë publikisht, duke njoftuar edhe një vendim të rëndësishëm për koncertin e tij.
Përmes një postimi në rrjetet sociale, këngëtari bëri të ditur se koncerti “MOTIV”, i planifikuar të mbahej gjatë muajit gusht në Vlorë, nuk do të zhvillohet sipas planit dhe është shtyrë për një datë ende të pacaktuar.
Sipas Albanit, koncerti ishte përgatitur prej muajsh me shumë përkushtim, por zhvillimet e fundit në vend e kanë bërë të rishqyrtojë këtë vendim.
“Megjithatë, për shkak të situatës së krijuar në vend kam vendosur që koncerti i planifikuar në Vlorë të mos zhvillohet ose të shtyhet për një datë të pacaktuar,” u shpreh artisti.
Alban Skënderaj via Instagram Story
Në reagimin e tij, Alban Skënderaj theksoi se për të muzika ka misionin të bashkojë njerëzit dhe të përcjellë shpresë, veçanërisht në periudha të vështira, ndërsa shprehu dëshirën që situata të zgjidhet në mënyrë paqësore dhe qytetare.
Vendimi i tij vjen pasi emri i këngëtarit u përfshi në debatet publike lidhur me reagimet e figurave të njohura ndaj protestave.
Ndërkohë, në rrjet janë bërë edhe krahasime me artistë të tjerë që kanë vijuar aktivitetet e planifikuara. Megjithatë, këto mbeten interpretime dhe reagime të publikut, ndërsa vetë Alban Skënderaj është kufizuar në shpjegimin e vendimit të tij për shtyrjen e koncertit, pa komentuar qëndrimet e kolegëve.
