Elijona Binakaj ka folur për herë të parë më gjerësisht rreth ndarjes nga Klodi, duke iu përgjigjur disa prej pyetjeve që kanë qarkulluar prej javësh në rrjetet sociale për fundin e lidhjes së tyre.
Një nga aludimet më të përfolura ka qenë pretendimi se Klodi mund ta ketë tradhtuar Elijonën me një mashkull. Ky version është përmendur publikisht edhe nga Labinot Rexha, por deri më tani nuk është paraqitur asnjë provë dhe asnjëri prej ish-partnerëve nuk e ka konfirmuar këtë pretendim.
E ftuar në rubrikën “25 pyetje” të Prive By LS, Elijona u pyet për arsyet që çuan në përfundimin e romancës. Megjithatë, ajo zgjodhi të mos hyjë në detaje, duke theksuar se disa gjëra duhet të mbeten jashtë vëmendjes së publikut.
“Disa gjëra, për shkak të respektit ndaj asaj që ka qenë, nuk kanë vend publik. Unë jam natyrë e sinqertë dhe nuk më pëlqen të jap shpresa aty ku nuk ka shpresa. Është një gjë e ditur nga të dyja palët”, deklaroi ajo.
Edhe pse nuk dha një përgjigje konkrete për dyshimet për tradhti, mënyra se si u shpreh ka shtuar kureshtjen rreth asaj që mund të ketë ndodhur mes tyre.
Gjatë intervistës, Elijona u pyet gjithashtu për fotografitë e përbashkëta me Klodin, të cilat ende gjenden në profilet e tyre në rrjetet sociale. Ajo pranoi se ndoshta ka ardhur koha që këto kujtime të largohen edhe nga hapësira virtuale.
Një tjetër temë ishte mundësia e rikthimit me një ish-partner. Për këtë, Elijona bëri një dallim mes miqësisë dhe dashurisë: në marrëdhëniet shoqërore beson se njerëzit mund të gabojnë dhe meritojnë një mundësi për t'u përmirësuar, ndërsa në dashuri qëndrimi i saj është më i prerë.
Ajo u shpreh se mund të japë një shans të dytë, por jo një të tretë.
Kujtojmë se Elijona konfirmoi ndarjen nga Klodi në fund të shtatorit, përmes një postimi në rrjetet sociale. Lidhja e tyre zgjati vetëm pak kohë, por përfundimi i saj u shoqërua me shumë diskutime dhe spekulime.
Për momentin, arsyeja e vërtetë e ndarjes mbetet private, pasi Elijona ka zgjedhur të mos zbulojë më shumë rreth asaj që ka ndodhur mes tyre.
