Ish-konkurrenti i Big Brother VIP Albania, Alesio Alia, ka bërë disa komente që kanë tërhequr vëmendjen pas largimit të tij nga shtëpia e spektaklit. Ai vendosi të largohej me dëshirën e tij pak ditë më parë dhe së fundmi ishte i ftuar në një intervistë në Top News me moderatoren Fiori Dardha, ku ndau përshtypjet nga eksperienca e tij në reality show.
Gjatë intervistës, Alesio u ndal edhe tek raporti me banoren Brikena Selmani. Sipas tij, ajo ka shfaqur njëfarë simpatie ndaj tij gjatë qëndrimit në shtëpi.
“Brikena kishte një pëlqim për mua,” tha ai, duke lënë të kuptohet se mes tyre mund të ketë pasur diçka më shumë sesa një raport të thjeshtë shoqëror.
Në të njëjtën kohë, ai sugjeroi se Brikena nuk duket se ka ndonjë interes të veçantë për banorin tjetër, Mateo Borri, pavarësisht diskutimeve dhe situatave që janë komentuar gjatë qëndrimit të tyre në shtëpinë e BBVA.
Ndërkohë, Alesio tregoi edhe për jetën e tij jashtë shtëpisë, duke zbuluar se është në një lidhje dashurie. Ai tha se kjo është edhe një nga arsyet pse po kalon më shumë kohë në Shqipëri këtë periudhë.
Megjithatë, ish-banori u shpreh se e vlerëson eksperiencën që pati në Big Brother VIP Albania dhe theksoi se nuk ka asnjë pendesë për mënyrën si e përjetoi rrugëtimin e tij në këtë format televiziv.
