Prime-i i fundit i Big Brother VIP Albania solli shumë tension dhe zhvillime të forta në shtëpi. Një nga momentet më të rëndësishme të mbrëmjes ishte zgjedhja e Mirit si lider i shtëpisë, një rol që i dha atij avantazhin për të çuar disa banorë direkt në nominim.
Duke përdorur këtë të drejtë, ai vendosi që në televotim të shkonin disa nga emrat më të komentuar të shtëpisë: Brikena, Selin, Mateo dhe DJ Gimbo. Ky vendim shkaktoi menjëherë reagime dhe diskutime të shumta mes banorëve dhe publikut.
Megjithatë, ajo që po bën më shumë bujë në rrjetet sociale nuk është vetëm lista e nominimeve. Një video e publikuar në TikTok, para nisjes së Prime-it, duket se kishte parashikuar pikërisht këtë skenar, gjë që ka ngritur dyshime tek ndjekësit për mënyrën se si po zhvillohen ngjarjet.
Sipas të njëjtit postim, që tashmë është bërë viral, edhe pse televotimi duket i fortë, në fund të javës nuk pritet të ketë një eliminim përfundimtar. Teoria që po qarkullon sugjeron se i larguari mund të jetë ose Gimbo ose Brikena, por personi që del nga shtëpia mund të ketë në dorë “biletën e fatit”, element i lojës që i jep mundësinë të rikthehet menjëherë në garë.
Ndërkohë, diskutimet në rrjet vazhdojnë të shtohen dhe shumë fansa po pyesin nëse kemi të bëjmë me një skenar të zbuluar apo thjesht me një rastësi. Gjithsesi, përgjigjja pritet të zbulohet vetëm në spektaklin e ardhshëm.
